Türkmenistanyň Magtymguly adyndaky Ýaşlar guramasynyň Merkezi geňeşiniň, Türkmenistanyň Bilim ministrliginiň yglan eden «Iň eýjejik gyzjagaz» atly bäsleşigine ýurdumyzyň orta mekdepleriniň 2 — 4-nji synplarynda bilim alýan gyzjagazlar gatnaşýarlar. «Pähim-paýhas ummany Magtymguly Pyragy» ýylynyň şanly dabaralara beslenýän günlerinde Saparmyrat Türkmenbaşy etrabyndaky 93-nji orta mekdebiň 2-nji synp okuwçysy Nurşat Myratowa bu bäsleşigiň döwlet tapgyrynda Baş baýraga mynasyp boldy. Nurşadyň gazanan ajaýyp ýeňşi baýramçylyga mynasyp sowgat boldy.
Nurşat MYRATOWA,
Saparmyrat Türkmenbaşy etrabyndaky 93-nji orta mekdebiň 2-nji synp okuwçysy:
— Berkarar döwletiň täze eýýamynyň Galkynyşy döwründe ýaş nesilleriň döredijilik bilen meşgullanmagyna, ukyp-başarnygyny ýüze çykarmagyna ähli mümkinçilikler döredilýär. Men çagalar bagyna gatnaýan döwrümden bäri aýdym aýdyp gelýärin. Meniň ilkinji ýerine ýetiren aýdymym «Watan» atly aýdym.
Maňa-da «Iň eýjejik gyzjagaz» atly şadyýan bäsleşigiň döwlet tapgyrynda Baş baýraga mynasyp bolmak bagty miýesser etdi. Men bu bäsleşikde «Arkadagly Serdarym» atly aýdymymy ýerine ýetirdim. Aýdym-saz meň gowy görýän ugrum. Meniň sungatyň inçe tilsimlerini öwrenmegimde halypam, mekdebimiziň aýdym-saz mugallymy Gülnabat Amanmädowanyň orny örän uludyr.
Men aýdym-sazdan başga-da bu bäsleşikde ik egrip, alaja örüp, keşde çekip bilýändigimi görkezdim. Bäsleşikde meniň bu işlerime-de baha berildi.
Hormatly Prezidentimizi, Gahryman Arkadagymyzy giňden bellenilýän Milli bahar baýramy bilen tüýs ýüregimden gutlaýaryn. Biziň döredijilikli okap bilim almagymyz üçin ähli mümkinçilikleri we şertleri döredýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun!
“Daşoguz habarlary” gazetinde çap edilen
habarlar esasynda taýýarlanyldy.