Türkmenistanyň Demokratik partiýasynyň Daşoguz şäher komiteti Beki Seýtäkow adyndaky mugallymçylyk mekdebi bilen bilelikde Milli bahar baýramy mynasybetli «Dabarasy dolup bütin äleme, bagty buşlap, Nowruz geldi ilime» atly aýdym-sazly dabaraly maslahat geçirdi. Mugallymçylyk mekdebiniň mejlisler zalynda geçirilen dabaraly maslahatda çykyş edenler bagtyýar we joşgunly ýaşaýşyň baýramy bolan Nowruz baýramynyň baharyň buşlukçysy hasaplanyp, ynsanlary birek-birege ýakynlaşdyrýan, dostlukly gatnaşyklary pugtalandyrýan, zähmetsöýerlige ruhlandyrýan baýramdygyny bellediler. Nowruz baýramynyň ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizilendigi, şeýle hem 2010-njy ýylyň fewral aýynda Birleşen Milletler Guramasynyň Baş Assambleýasynyň 64-nji mejlisinde her ýylyň 21-nji martyny «Halkara Nowruz güni» diýip yglan etmek barada Kararnamanyň kabul edilendigi, Gündogar halklarynyň taryhy-medeni däp-dessurlaryny dünýä ýüzüne ýaýýan bu baýramyň her ýylda täze röwüşde, şatlyk-şowhunly bellenilýändigi dogrusynda nygtadylar. Nowruzda ýaňy gögeren ýaşyl bugdaýdan Äşe-Patmanyň aşy hasaplanylýan semenini ene-mamalarymyzyň üýşüp bişirip, goňşy-golama, ýakynlaryna paýlaýandygyny, munuň hem agzybirligiň, parahatçylyk söýüjiligiň, hoşniýetliligiň nyşanydygyny bellediler.
Şeýle ajaýyp döwürde gadymdan dowam edip gelýän däp-dessurlarymyza, urp-adatlarymyza, milli mirasymyza uly üns berýän we ony dünýä ýüzünde dabaralandyrýan hormatly Prezidentimize alkyş sözleri aýdyldy.
Dabaranyň dowamynda mugallymçylyk mekdebiniň aýdym-saz toparynyň ýerine ýetiren baýramçylyk çykyşlary dabara gatnaşanlara ruhy lezzet paýlady.
“Daşoguz habarlary” gazetinde çap edilen
habarlar esasynda taýýarlanyldy.