Il saglygy aladasy Arkadagly Serdaryň,
Saýasynda güller açýar Diýarym!
«Halkyň Arkadagly zamanasy» ýylynda hormatly Prezidentimiziň ak pata bermeginde welaýatymyzyň merkezi Daşoguz şäherinde gurlup ulanylmaga berlen 450 orunlyk köpugurly hem-de 150 orunlyk onkologiýa hassahanalary asly halal, merdana halkymyzyň göwün guşuny ganatlandyrdy. Welaýat köpugurly hassahanasynda alnyp barylýan işler dogrusynda hassahananyň baş lukmany Haýytmyrat Gurbanow bilen söhbetdeş bolduk.
— Ýurdumyzda adamlaryň saglygyny goramak maksady bilen durmuşa geçirilýän beýik işler dünýä içre nusgalyk derejä eýedir. Gahryman Arkadagymyzyň ýoluny mynasyp dowam etdirýän Arkadagly Serdarymyz il saglygynyň ygtybarly goragyny üpjün etmäge gönükdirilen beýik işleri durmuşa geçirýär. Täze taryhy döwrümiziň bedew badyna bat goşan bu ýörelge esasynda ýurdumyzda täze hassahanalar, bejeriş-sagaldyş edaralary yzygiderli gurlup, halkymyzyň hyzmatyna berilýär. Döredilen oňyn şertlerden peýdalanyp, saglyk ulgamynda zähmet çekýän lukmanlar öňde durýan wezipeleri üstünlikli amala aşyryp, bu döwletli tutumlara mynasyp goşant goşýarlar. Daşoguz şäheriniň täze binalarynyň hataryndan orun alan köpugurly hassahanamyz hormatly Prezidentimiziň mähriban halkymyz barada edýän uly aladalarynyň aýdyň subutnamasydyr. Iş orunlarynyň köp sanlysynyň döremegini üpjün eden täze hassahana dünýäniň ösen döwletlerinde öndürilen iň kämil lukmançylyk enjamlary bilen enjamlaşdyrylandyr. Welaýat köpugurly hassahanada innowasion tehnologiýalara esaslanýan sanly ulgam ornaşdyryldy. Desganyň ähli ýatymlaýyn bölümleri bolsa merkezleşdirilen kislorod we nobatçy şepagat uýasyny çagyrmak ulgamy bilen üpjün edildi. Şeýle hem Germaniýanyň «Aerocom» kompaniýasynyň pnewmatik poçta ulgamy näsaglaryň barlaglarynyň netijelerini tiz wagtda lukmanlara ýetirmek maksady bilen, bölümleri özara baglanyşdyrýan tutuş uly bir ulgamy emele getirýär. Hassahananyň innowasion tehnologiýalar esasynda enjamlaşdyrylmagy halkymyza ýokary derejede lukmançylyk hyzmatyny etmäge amatly şertleri döredýär. Şeýle-de hünärmenleriň netijeli işlemegine, näsaglara agyrysyz hem rahat ýagdaýda bejergi berilmegine, bejeriş işlerini çalt geçirmäge, keselleri takyk anyklap, öz wagtynda, gijikdirmän bejermäge oňaýly şert döredýär. Ilatyň saglygyny goramak üçin has uly mümkinçilikleri döredip berýän Arkadagly Serdarymyzyň jany sag, belent başy aman bolsun!