Guwandyryjy netijelere bagyşlanan maslahat.
Ajaýyp üstünliklere, ýokary netijelere beslenen 2021-2022-nji okuw ýylynyň tamamlanmagy mynasybetli çäreler welaýatymyzda «Halkyň Arkadagly zamanasy» ýylynda dabaraly bellenip geçildi. Şu okuw ýylynda geçirilen ders bäsleşiklerinde, dürli ugurdan geçirilen ýaryşlarda welaýatymyzyň mekdep okuwçylary hem baýrakly orunlaryň birnäçesini gazandylar. Bu mynasybetli şäherimizdäki daşary ýurt dillerine ýöriteleşdirilen 25-nji orta mekdepde geçirilen maslahatda giňişleýin bellenip geçildi. Maslahatda welaýat häkiminiň orunbasary Ogulaltyn Çerkezowa, welaýat Baş bilim müdirliginiň başlygy Aşyrmyrat Kirliýew, TKA-nyň welaýat birleşmesiniň başlygy, Türkmenistanyň Milli Geňeşiniň Mejlisiniň deputaty Aşyrdurdy Allaýew, TDP-niň welaýat komitetiniň başlygy Merdan Meredow, TAP-nyň welaýat komitetiniň başlygy Akmyrat Mämedow, TSTP-niň welaýat komitetiniň başlygy, Milli Geňeşiň Mejlisiniň deputaty Myratgeldi Goçmedow, TMÝG-niň welaýat geňeşiniň başlygy Magsat Otuzow dagy çykyş edip, ýaş nesilleriň döwrebap bilim almagy üçin döredilýän şertler, welaýatymyzyň mekdep okuwçylarynyň gazanýan üstünlikleri dogrusynda buýsançly söhbet etdiler. Maslahatyň dowamynda halkara we döwlet derejesinde geçirilen bäsleşiklerde ýeňiji bolan okuwçylara hem-de mugallymlara Hormat hatlarynyň we jemgyýetçilik guramalarynyň adyndan baýramçylyk sowgatlarynyň gowşurylmagy onuň şowhunyny has-da artdyrdy.